Un ano máis Brión celebrou a súa tradicional festa de Entroido. A xornada de celebración comezou pasadas as 16:30 h., iniciándose co desfile de participantes dende o Pavillón Polideportivo Municipal de Brión. De seguido, os participantes recorreron a distancia que os separaba da Rúa Tarrío acompañados pola charanga Os Celtas. Alí esperábaos o xurado e a maior parte do numeroso público asistente para iniciar a fase de concurso, onde se repartiron máis de 2500 € en premios.

O alcalde de Brión, Pablo Lago, e a conselleira de Medio Ambiente e Cambio Climático, Ángeles Vázquez, visitaron na mañá do sábado 22 de febreiro as fontes-lavadoiros de Alqueidón (Os Ánxeles) e Boaventura (Brión), que foron rehabilitados ao abeiro da orde de axudas da Xunta para a corrección de impactos paisaxísticos.

A concelleira de Cultura, Sandy Cebral, e a investigadora María Susana Peleteiro Fernández inauguraron na noite de onte xoves a exposición “Traxes tradicionais de Galicia e o falseamento histórico na folclorización: exposición didáctica”.